bitsia

Мрежа од девет невладини организации предводена од Центарот за граѓански комуникации направи проценка на ризиците од корупција во јавните набавки во осум општини од земјава: Битола, Кичево, Куманово, Неготино, Струмица, Тетово, Чаир и Штип. Истражувањата се фокусираа на јавните набавки спроведени од општините и од локалните јавни претпријатија. Истражувањата се спроведени врз основа на унифицирана методологија која се заснова на 18 индикатори и ги опфаќа сите фази во јавните набавки, овозможувајќи да се добие јасна слика за потенцијалните ризици од корупција на ниво на секоја институција. Кои се клучните проблеми и како тие да се надминат прочитајте во извештаите кои се изработени во рамките на пректот „Заштита од корупција“ што се спроведува со финансиска поддршка на Амбасадата на Кралството Холандија во Скопје.Извештај Битола | Извештај Кичево | Извештај Куманово | Извештај Неготино | Извештај Струмица | Извештај Тетово | Извештај Чаир | Извештај Штип |

Платформата на граѓански организации за борба против корупцијата, чија членка е и Центарот за граѓански комуникации, го објави првиот Антикорупциски месечник за ноември 2022 година како информатор за активностите на членките на Платформата во изминатиот месец. Платформата е активна мрежа на граѓански организации која промовира добро владеење, предводи иницијативи и презема чекори за застапување во насока на охрабрување на граѓаните и поттикнува политичка волја за борба против корупцијата во Република Северна Македонија.

Повеќе од 170 претставници на општините и локалните јавни претпријатија од Битола, Кичево, Куманово, Неготино, Струмица, Тетово, Чаир и Штип учествуваа во низата од 8 обуки одржани од мај до октомври оваа година, а кои треба да им помогнат на општинската администрација и на вработените во локалните јавни претпријатија за воведување систем за интегритет, за зголемување на транспарентноста, како и проценка на ризиците од корупција во јавните набавки и нивно намалување. Обуките се дел од проектот „Заштита од корупција“ што се спроведува со поддршка на Амбасадата на Кралството Холандија.

Истражувањето спроведено во текот на јуни 2022 година покажа дека 30-те најголеми претпријатија во 2022 година објавиле само 48 % од информациите и од документите што треба да ги објават на своите веб-страници. Произлегува дека во период од две години е остварен минимален пораст на транспарентноста и на отчетноста на претпријатијата од само 7 процентни поени. За споредба, во 2020 година, претпријатијата објавуваа 41 % од релевантните информации и документи, додека во 2018 – само 28 %. На овој начин, транспарентноста на претпријатијата во период од две години е зголемена за само 7 процентни поени, но сè уште се наоѓа на ограничено ниво на транспарентност.

Деветнаесеттиот индекс на рационалност е изработен за следниве три видови производи: - прочистувачи на воздух;- лаптоп компјутери и- индустриска сол. Во изработката на индексот на рационалност за овие производи се вклучени 21 институција на национално и на локално ниво кои во текот на 2020 и 2021 година имале ваков вид набавка. Во изработката на индексите, цените на избраните производи и услуги се обезбедуваа преку барања за пристап до информациите од јавен карактер, доставувани до сите договорни органи чиишто набавки беа евидентирани на Електронскиот систем за јавни набавки. Идејата е, со изработка на индексот на овие три вида производи, да се детектираат евентуалните разлики во цените и да им се помогне на договорните органи да ги осознаат движењата на цените за овие производи и во иднина да работат врз подобрување на рационалноста во трошењето на јавните пари.

Осумнаесеттиот индекс на рационалност е изработен за следниве три видови производи: - училишни интерактивни табли; - пeлети со топлинска моќност од минимум 4,6 kwh/kg и пелети со топлинска моќност од 4,9 до 5,3 kwh/kg и - хартија за печатење. Во изработката на индексот на рационалност за овие производи се вклучени 36 институции на национално и на локално ниво коишто во текот на втората половина од 2021 година имале ваков вид набавка. Во изработката на индексите, цените на избраните производи, како и техничките карактеристики на производите се обезбедуваа преку барања за пристап до информациите од јавен карактер што беа доставени до сите договорни органи чиишто набавки беа евидентирани на Електронскиот систем за јавни набавки. Идејата е, со изработка на индексот на овие три вида производи, да се детектираат евентуалните разлики во цените и да им се помогне на договорните органи да ги осознаат движењата на цените за овие производи и во иднина да работат врз подобрување на рационалноста во трошењето на јавните пари.

Јавни набавки и користење конкурентни процедури во услови на криза Овој документ за јавни политики има за цел да ги сумира искуствата и да предложи можни решенија за подобрување на регулативата и на практиките на јавните набавки за време на кризни ситуации.Од една страна, системот треба да биде доволно приспособлив кон непредвидливите околности што се јавуваат во кризни состојби, а од друга, треба да овозможи максимално ниво на законитост, транспарентност и отчетност, со што ќе се намалат можностите за злоупотреби.